लालपुर्जाको श्रेष्ता कायम गर्न सास्ती खेप्दै सेवाग्राही

नेपालगन्ज ५ जेठ : बाँकेमा जग्गाधनी पुर्जाको श्रेष्ता कायम गर्न लेखापढी व्यवसायी र कानून व्यवसायीले सेवाग्राहीबाट चर्को मूल्य असुलिरहेको पाइएकोछ । 

गत सालको भादौ २४ गतेको जेनजी आन्दोलनका क्रममा आगजनी गरिएको तत्कालिन मालपोत कार्यालय बाँकेमा जलेर नष्ट भएका जग्गाधनी पुर्जाको श्रेष्ता कायम गराउन सेवाग्राहीले चर्को मूल्य तिरिरहेका हुन् । 

नेपालगन्ज विद्युत कार्यालय नजिक भाडाको भवनमा रहेको साबिक मालपोत कार्यालय, हाल भूमि प्रशासन कार्यालय, नेपालगन्जमा जलेर नष्ट भएका जग्गाधनी पुर्जाको श्रेष्ता कायम गर्ने कार्य चलिरहेको छ ।

वडा कार्यालयको सिफारिस, नागरिकताको प्रतिलिपी र सक्कल लालपुर्जा लिएर कार्यालय पुग्ने जग्गाधनीको श्रेष्ता कायम हुन्छ । श्रेष्ता कायम गर्न कुनै राजश्व तिर्नु पर्दैन । तर, सेवाग्राही मैत्री भवन नहुनु र विभिन्न फाँटमा पुग्नुपर्ने झन्झटिलो कार्यको फाइदा उठाउँदै लेखापढी व्यवसायी र कानून व्यवसायीले सेवाग्राहीबाट चर्को मूल्य असुलिरहेका हुन् ।

निःशुल्क श्रेष्ता कायम हुने भएपनि विभिन्न बहाना बनाउँदै लेखापढी र कानून व्यवसायीले लुट मच्चाइरहँदा बाँके प्रहरी र प्रशासन मौन रहेकोछ ।

तीन तलाको उक्त भवनमा पटक–पटक फाँट र बिभिन्न टेबलमा पुग्नुपर्ने बाध्यताका कारण लेखापढी व्यवसायी र कानून व्यवसायीको सहारा लिनुपरेको सेवाग्राहीले गुनासो गरेका छन् । 

नरैनापुरका पतिराम भुजुवाले आफुसँग लेखापढी नभएको भन्दै ६ वटा लालपुर्जाको प्रति लालपुर्जा २ हजार ५०० तिरेर श्रेष्ता कायम गरेको बताए । कार्यालयमा निःशुल्क हुने कामलाई लेखापढी व्यवसायीहरुले चर्को मूल्य तोकेर सेवाग्राहीहरुबाट रकम असुल्ने गरेका छन् ।

सहायता कक्षले आवेदन लेखिदिने र भूसेवाको काम निःशुल्क गरिदिएपनि फाँट–फाँट दौडनुपर्ने परम्परागत परिपाटीका कारण सेवाग्राहीहरु चर्को रकम तिर्न बाध्य बन्नु परेको सेवाग्रहीको गुनासो छ ।

हिरमिनियाबाट श्रेष्ता कायम गर्न आएका समरसबहादुर सिंहले एउटा फाँटमा फायल बुझाएपछि सनाखतका लागि बाहेक अन्य अवस्थामा सेवाग्राही फाँटफाँट दौडनुपर्ने परिपाटी बन्द गर्नुपर्ने बताउँछन् । फाँटहरुमा पनि टोकनको व्यवस्था हुनुपर्ने उनको माग छ । ‘फाँटको सानो झ्याल पहिल्यै लेखापढीका कर्मचारीले कब्जा गरेर बस्छन्, गाँउबाट आएका सेवाग्राहीले पालै पाउँदैनन् ।’ उनले भने । लेखापढी व्यवसायीका कर्मचारीहरुले बाटैबाट सेवाग्राहीलाई तानेर आफ्नो कक्षमा लैजाने गरेको समेत सेवाग्राहीको गुनासो छ ।

यसैबीच, बैशाख मसान्तसम्म कार्यालयबाट १८ हजार ७१५ श्रेष्ता कायम गरिएको साबिक मालपोत कार्यालय हाल भूमि प्रशासन कार्यालय बाँकेका प्रमुख सबिनसिंह चौधरीले बताए । 

उनका अनुसार कार्यालयको ‘क’ फाँटबाट ९ हजार ५८० जनाले श्रेष्ता कायम गराएका छन् भने फाँट ‘ख’ बाट ७ हजार ४३५ जनाको श्रेष्ता कायम भएको छ ।

विवरण नभेटिएका, शंकास्पद र प्रमाण नपुगेका जग्गा धनीको मुद्दा फाँटबाट निरुपण गरि श्रेष्ता कायम गरिएको कार्यालय प्रमुख चौधरीले बताए । यसरी श्रेष्ता कायम भएकाहरुको संख्या एक हजार ७०० थान रहेको उनले बताए ।

वडा कार्यालयको सिफारिस, नागरिकताको प्रतिलिपी र सक्कल लालपुर्जा लिएर कार्यालय पुग्ने जग्गाधनीलाई कार्यालयबाट श्रेष्ता कायम गरिदिने गरिएको उनले बताए । 

श्रेष्ता कायम गर्न कुनै राजश्व नलाग्ने पनि उनले जानकारी दिए । सेवाग्राही मैत्री भवन नभएकाले सेवाग्राहीले केही असहज महशुस गरेको भने मालपोत अधिकृत चौधरीले स्वीकार गरे ।