आजदेखि एसइई सुरु, एक महिनामै नतिजा ल्याउने

आजदेखि एसइई सुरु, एक महिनामै नतिजा ल्याउने

File Photo

नेपालगन्ज १९ चैत : देशभर आजदेखि माध्यमिक शिक्षा परीक्षा सुरु भएको छ ।
चैत १९ गतेदेखि २९ गतेसम्म सञ्चालन हुने एसइईका लागि सम्पूर्ण तयारी पूरा भएको बोर्डले जनाएको छ । बोर्डका अनुसार परीक्षामा पाँच लाख १२ हजार ४२१ जना सहभागी हुने भएका छन् ।

बोर्डको परीक्षा नियन्त्रण कार्यालय (कक्षा १०) का अनुसार परीक्षामा दुई लाख ५७ हजार ६१३ जना छात्रा र दुई लाख ५४ हजार ८०१ जना छात्र सहभागी हुँदै छन् । परीक्षाका लागि एक हजार ९६६ केन्द्र तोकिएको परीक्षा नियन्त्रक टुकराज अधिकारीले जानकारी दिए ।

यस वर्षको माध्यमिक शिक्षा परीक्षा (एसइई) को नतिजा एक महिनाभित्रै सार्वजनिक हुने भएको छ । शिक्षा, विज्ञान तथा प्रविधि मन्त्रालयको निर्देशनमा राष्ट्रिय परीक्षा बोर्डले यसको तयारी गरिरहेको छ । यसअघि परीक्षा सकिएको सामान्यतया तीन महिनाभित्र नतिजा प्रकाशन हुँदै आएको थियो । 
गत वर्ष चैत १५ गतेदेखि २७ गतेसम्म सञ्चालन भएको एसइईको नतिजा तीन महिनापछि अर्थात् असार १३ गते सार्वजनिक भएको थियो ।

त्यतिबेला पनि एसइई सकिनेबित्तिकै शिक्षक आन्दोलनका कारण एक महिनापछि मात्रै उत्तरपुस्तिका परीक्षण सुरु भएको थियो । त्यतिबेला पनि तीन महिनामै नतिजा सार्वजनिक भएको देखिए पनि नतिजा प्रकाशनसँग सम्बन्धित काम भने दुई महिना मात्रै भएको थियो ।
बोर्डका सदस्यसचिव जङ्गबहादुर अर्यालका अनुसार यसपटक एक महिनाभित्रै नतिजा सार्वजनिक गरिनेछ ।

Duduwa Tato hawa Bachau Image

उनका अनुसार एक महिनाभित्र नतिजा प्रकाशनका लागि परीक्षा सञ्चालन भएको केन्द्रमै उत्तरपुस्तिका परीक्षण गरिने छ ।
भौगोलिक विकटता र अन्य प्राविधिक जटिलता हुने ठाउँको उत्तरपुस्तिका भने अन्य केन्द्र वा वैकल्पिक ठाउँमा लगेर परीक्षण गरिने छ । यसका लागि थप कार्यविधि निर्माणको लागि मन्त्रालयमा छलफल भइरहेको छ ।
उनले भने, “कार्यविधि बनिरहेको छ । छिट्टै पारित भएर कार्यान्वयनमा पनि जाला । तर एक महिनामै नतिजा प्रकाशन गर्न मन्त्रालयबाट निर्देशन भइसक्यो । हामी त्यसैको तयारीमा जुटिसक्यौँ ।”