बैजनाथको बजेट सर्वसम्मत पारित
८२ करोड २१ लाख ५२ हजार एक सय ५३ रुपैयाँ बराबरको बजेट
बैजनाथ ३० असार : बाँकेको बैजनाथ गाउँपालिकाले आगामी आर्थिक वर्ष २०८२-०८३ का लागि प्रस्तुत गरेको ८२ करोड २१ लाख ५२ हजार एक सय ५३ रुपैयाँ बराबरको बजेट सर्वसम्मत रुपमा पारित गरेको छ ।
गाउँपालिका कार्यालय रामपुरमा आईतबार सम्पन्न भएको १८ औं गाउँसभाको तेस्रो बैठकमा उक्त बजेट सर्वसम्मत रुपमा पारित भएको हो । गाउँसभाको दोस्रो बैठकमा असार १० गते उपाध्यक्ष निर्मला रोकायले आगामी वर्षका लागि अनुमानित बजेट प्रस्तुत गरेकी थिइन् ।
गाउँपालिका अध्यक्ष प्रकाशबहादुर शाहीको सभाध्यक्षतामा आईतबार बसेको १८ औं सभाको तेस्रो बैठकले सर्वसम्मत रुपमा बजेट पारित गरेको प्रमुख प्रशासकीय अधिकृत धर्मराज न्यौपानेले जानकारी दिए । सोही सभाले उत्कृष्ट कर्मचारी तथा बिद्यालयलाई पनि सम्मान गरेको छ ।
गाउँपालिकाले उत्कृष्ट बिद्यालयका रुपमा विपी मेमोरियल माध्यामिक बिद्यालय बैजनाथ–१ चिसापानी बाँके तथा उत्कृष्ट कर्मचारीका रुपमा स्वास्थ्य चौकी चिसापानीका प्रेम शाह, गाउँपालिकाको राजश्व शाखा प्रमुख दीपा ओली र बैजनाथ गाउँपालिका–५ नम्बर वडाका कार्यालय सहायक तुल्सी थारुलाई २० हजार नगदसहित दोसल्ला र सम्मान पत्र सहित सम्मान गरेको हो ।
गाउँपालिका अध्यक्ष शाही, उपाध्यक्ष रोकाय र प्रमुख प्रशासकीय अधिकृत न्यौपानेले उनीहरुलाई सम्मान गरेका थिए । सोही सभामा बैजनाथ गाउँपालिकाले आर्थिक वर्ष २०८१-०८२ मा प्रकाशनमा ल्याएको ‘समृद्ध बैजनाथ’ र ‘किसानसँग पालिका प्रमुख कार्यक्रमको स्मारिका’ पनि विमोचन गरिएको गाउँपालिकाका प्रशासन शाखा प्रमुख तप्तराज आचार्यले जानकारी दिए ।
Comment
0 Comments