लुम्बिनी कप महिला फुटबलको तयारीमा तीब्रता

नेपालगन्ज ४ माघ : आगामी फागुन १९ गतेदेखि नेपालगन्जमा आयोजना हुने लुम्बिनी कप महिला फुटबल प्रतियोगिताको प्रारम्भिक तयारीका बारेमा पत्रकारलाई जानकारी गराइएको छ ।

अन्तरालको आयोजना र बाँके जिल्ला फुटबल संघको सहकार्यमा लुम्बिनी कप महिला फुटबल यही फागुन १९ गतेदेखि २९ गतेसम्म नेपालगन्जमा हुँदैछ । झण्डै एक करोड ३५ लाख खर्च हुने प्रारम्भिक अनुमान गरिएको उक्त प्रतियोगिता ए लेबलको गर्ने तयारी गरिएको छ । यसका लागि श्रोत व्यवस्थापनमा समेत टिम लागि परेकोछ । 

नेपालगन्ज रंगशालामा आयोजना गरिएको पत्रकार भेटघाट कार्यक्रममा अन्तरालका कार्यकारी प्रमुख जयनारायण शाहले प्रतियोगितालाई सभ्य तथा भव्यरुपमा सञ्चालन गर्न युद्धस्तरमा तयारी थालिएको जानकारी गराए ।

‘खेलाडी तथा अफिसियलको बसोबास, खानपान तथा आउजाउलाई हामीले मुख्य प्राथमिकतामा राखेका छांै’—कार्यकारी प्रमुख शाहले भने ।

प्रतियोगितामा भारतका दुई र नेपालका ६ गरी आठ वटा क्लबको सहभागिता रहने शाहले बताए । पत्रकारद्वारा सोधिएको प्रश्नको जवाफमा शाहले भने—‘स्रोत व्यवस्थापनका आधारमा प्रतियोगिताका विजेता, उपविजेता र तथा विभिन्न विद्याका उत्कृष्ट खेलाडीलाई नगदसहितको पुरस्कार उपलव्ध गराइने छ ।’

एक अर्को प्रश्नको जवाफमा शाहले भने लुम्बिनी कप महिला फुटबलको सचिवालय नेपालगन्ज रंगशालामा स्थापना भइसकेको छ । ‘हामीले विभिन्न उपसमिति समेत गठन गरेर केन्द्रदेखि जिल्ला तहसम्मका विभिन्न सरोकारवाला पक्षसंग समन्वय, सहकार्य र सहयोगका सम्बन्धमा छलफल शुरु गरिसकेका छौ’—प्रमुख कार्यकारी शाहले भने ।

यति ठूलोस्तरको प्रतियोगिता नेपालगन्जमा आयोजना गर्नु नै मुख्य चुनौती रहेको बताउँदै प्रतियोगिता आयोजनाको अगुवाई अन्तरालले गरे पनि यसमा सबैले अपनत्व ग्रहण गर्न सक्नुपर्छ उनले भने ।

बाँके जिल्ला फुटबल संघका अध्यक्ष भोजराज शाहीले लुम्बिनी कप महिला फुटबल प्रतियोगिताका लागि स्थानीय एउटा सशक्त टीम सहभागि गराउने तयारी थालिएको बताए । 

पत्रकार भेटघाट कार्यक्रममा मिडिया संयोजक निरजकुमार गौतमले अहिलेसम्म भए गरेका तयारीका सम्बन्धमा जानकारी गराएका थिए । सो अवसरमा महिला फुटबल विकासका बहुआयामिक पक्षका बारेमा प्रकाश पारिएको थियो ।

पत्रकार भेटघाट कार्यक्रममा राखेप लुम्बिनी प्रदेश सदस्य जनक केसी, सचिवालय प्रमुख रमेश मल्ल, परिचालन तथा समन्वय समितिका तेजविक्रम शाह, बाँके महिला फुटबल समितिका अध्यक्ष नितु शाह चन्दलगायतको उपस्थिति रहेको थियो ।