यातायात कार्यालय कोहलपुर स्थानान्तरणको विरोध : सिडियोलाई बुझाइयो ज्ञापनपत्र

नेपालगन्ज २८ कार्तिक : बाँकेको नेपालगन्जमा रहेको यातायात व्यवस्था कार्यालय कोहलपुर स्थानान्तरण गर्न लागिएको भन्दै विरोध भएको छ । नेपालगन्ज उद्योग वाणिज्य सङ्घ र विभिन्न राजनीतिक दलका भातृ संगठनले विरोध जनाएकाछन् ।

यातायात व्यवस्था कार्यालय कोहलपुर स्थान्तरण गर्न लागिएको भन्दै नेपालगन्ज उद्योग वाणिज्य सङ्घले बाँकेका प्रमुख जिल्ला अधिकारीलाई ज्ञापनपत्र समेत बुझाएकोछ ।

यातायात व्यवस्था कार्यालय कोहलपुर स्थानान्तरण गर्ने कार्य अघि नबढाउन माग गर्दै जिल्ला प्रशासन कार्यालय बाँके मार्फत लुम्बिनी प्रदेशका उद्योग, पर्यटन तथा यातायात मन्त्री प्रचण्ड विक्रम न्यौपानेलाई ज्ञापनपत्र बुझाइएको हो । 

सङ्घका महासचिव भीमबहादुर रानाभाटले नेपालगन्जमा रहेका अधिकांश सरकारी कार्यालय प्रदेश संरचनापछि सुर्खेत र बुटवल स्थानान्तरण भएको र बाँकी रहेका कार्यालय पनि अन्यत्र स्थानान्तरण गर्ने कार्य तत्काल रोक्न माग गर्दै प्रदेश मन्त्रीलाई ध्यानाकर्षण पत्र बुझाइएको जानकारी दिए ।

रानाभाटले भने,‘नेपालगन्ज रित्ताउने र रित्तिने सिलसिला रोक्न चिन्ता जाहेर गर्दै सङ्घले ज्ञापनपत्र बुझाएको छ, आवश्यक परे चरणबद्ध आन्दोलनका कार्यक्रम सार्वजनिक गरिनेछ ।’

यातायात व्यवस्था कार्यालय नेपालगन्ज हाल बाँके गाउँमा भाँडाको घरमा रहेको छ । नेपालगन्ज उप–महानगरपालिकाले कार्यालयका लागि जग्गा उपलब्ध गराउने प्रतिबद्धता जनाए पनि यातायात व्यवस्था कार्यालय कोहलपुर स्थानान्तरण हुन लागेको भन्दै विरोध गरिएको छ । 

हाल नेपालगन्जमा यातायात कार्यालय रहेपनि सवारी चालक अनुमति पत्रका लागि प्रयोगात्मक परीक्षा कोहलपुरमा हुँदै आएको छ । उद्योग, पर्यटन तथा यातायात मन्त्री न्यौपानेका निजी सचिव शाखा अधिकृत प्रदीप खनालले नयाँ सवारी अनुमतिपत्रका लागि ट्रायल हुँदै आएको कोहलपुरमा सहजताका लागि बायोमेट्रिक र लिखितको काम समेत हुने गरी सेवा कार्यालय स्थापनाको तयारी गरिएको जानकारी दिँदै नेपालगन्जबाट कोहलपुर कार्यालय स्थानान्तरण गर्ने कुनै योजना नरहेको बताए ।

यातायात कार्यालय स्थानान्तरणको विषयमा नेपालगन्ज र कोहलपुरबासी विभाजित भएका छन् । बर्दिया लगायतका जिल्लामा कार्यालय स्थापना गर्न नसक्ने तर, एउटै जिल्लामा दुईवटा कार्यालय किन आवश्यक पर्ने भन्दै नेपालगञ्जबासीले प्रदेश सरकारको ध्यानाकर्षण गराएका छन् ।

यसैबीच, यातायात व्यवस्था कार्यालय कोहलपुर स्थान्तरण गर्न लागिएको भन्दै नेकपा एमाले, नेपाली काँग्रेस, नेकपा माओबादी केन्द्र, राप्रपा र नेकपा एसले संयुक्तरुपमा ध्यानाकर्षण पत्र जारी गरेकाछन् । 

नेकपा एमाले नेपालगन्ज नगर अध्यक्ष मोहित शाह, नेपाली काँग्रेस कार्यबहाक नगर सभापति धनराज बर्मा, नेकपा माओबादी नगर अध्यक्ष रतन शाही, राप्रपा नगर अध्यक्ष हुकुम केसी, नेपाली काँग्रेस क्षेत्र नम्बर २ का क्षेत्रीय सभापति रमेश कुमार गुप्ता र युवा संघ नेपाल, नेकपा एसका केन्द्रिय सदस्य विजयचन्द्र गुप्ताले उक्त ध्यानाकर्षण जारी गरेका हुन् । 

उनीहरुले यातायात व्यवस्था कार्यालय कोहलपुर स्थान्तरण गर्ने भन्ने अपुष्ट समाचारले चिन्तित तुल्याएको भन्दै नेपालगन्जको पहिचान र भविष्य मेट्ने कार्य रोक्न आग्रह गरेकाछन् ।