तिहारका लागि माटोका दियो बनाउन भ्याइनभ्याई

नेपालगन्ज २७ असोज : नेपालीहरुको दोस्रो ठूलो चाड तिहार नजिकिएसंगै बाँकेका कुम्हाल समुदाय यति बेला माटोका दियो लगायतका भाडा बनाउन व्यस्त छन् । उनीहरूलाई अहिले भाडा बनाउन भ्याइनभ्याई छ ।

तिहार र छठ जस्ता ठुला चाडपर्वमा माटोको दियोको माग सबैभन्दा बढी हुने गरेकाले कुम्हाल समुदायमा भाडा बनाउनेहरू दियो, कलश र भुर्की बनाउन केही समय यता निकै व्यस्त भएका हुन् । यतिबेला यस समुदायका अधिकांश मानिसहरू कोही माटो मुछ्ने त कोही माटोको भाँडा बनाउने काममा व्यस्त देखिन्छन् ।

नेपालगन्ज–३ का रमेश कुम्हालले आधुनिकता र नयाँ–नयाँ भाडा वर्तनको चलनले माटाबाट बनेका भाडाको बिक्री पहिले जस्तो नभएपनि अझै दियो लगायत केही भाडाको माग अत्यधिक हुने गरेकोले तयार गरिरहेको बताए ।

उनले पहिले जस्तो माग नभए पनि अहिलेपनि चाडपर्वमा माटोको भाडा खोज्नेहरू धेरै आउने गरेको र कतिपयले त खोजेर पनि नपाउँदा निराश भएर अन्य भाडाबाट काम चलाउने गरेकोले बनाउनु परेको बताए ।

हालको बजारको माग अनुसार घैटा, दियो, पाला, भुर्की आफुले बढी बनाउने गरेको रमेशको भनाइ छ । उनले सबैभन्दा बढी तिहारको बेला दियो बिक्री हुने गरेको र माग अनुसार पु¥याउनै नसकिने हुँदा केही समय पहिलेबाटै बनाउन सुरु गरेको बताए ।

प्रति दियो दुई रुपैयाँमा बेच्ने गरेको जनाउँदै उनले तिहारको बेला आफुले मात्र ३० हजारभन्दा बढी दियो बिक्री गर्ने गरेको सुनाए ।

सोही प्रकारले नेपालगन्ज–१३ का दिनेश कुम्हालले पनि अहिले आएर यो पेशाबाट जीवन धान्न निकै समस्या भए पनि आफुले पुख्र्यौली पेशालाई निरन्तरता दिँदै चाडपर्वको बेला बढी माटाका भाडाकुँडाहरू बनाउने गरेको बताउँछन् ।

उनले पुर्खाहरूले गरेको कामलाई चटक्कै छोड्न नसकिने जनाउँदै अहिलेको युवा पुस्तामध्ये अधिकांशले यो पेशा छोडिसके पनि आफुले आफ्नो पुर्खाको संस्कृतिको रूपमा रहेको यो पेसा जारी राखेको बताए ।

विशेष गरी तिहार तथा छठमा पूजाका लागि चाहिने माटाका भाँडाको माग अत्याधिक भएकाले भाडा बनाउन रात दिन नभनी व्यस्त रहेको अधिकांश स्थानीय कुम्हालको भनाइ छ ।

अहिले नेपालगन्जको सदरलाइन, त्रिवेणी मोड, त्रिभुवन चोक र आआफ्नै घरमा समेत कुम्हार समुदायले दियो र भुर्की लगायत माटोका भाडा बिक्री गरिरहेका छन् । त्रिभुवन चोकमा बाह्रै महिना माटोको भाडाको बिक्री हुने गरेको छ ।