बाँकेको नेपालगन्ज, डुडुवा र खजुरामा मोहर्रमको बिदा
- | नेपाखबर
- २२ असार २०८२, आइतवार
- नेपाखबर
नेपालगन्ज २२ असार : इस्लाम धर्माबलम्बीहरुको महान पर्व मोहर्रम पर्वको अवसरमा नेपालगन्ज् उपमहानगरपालिका र डुडुवा गाउँपालिकाले विदा दिएका छन् ।
आज आईतबार परेको मोहर्रम पर्वको अवसरमा नेपालगन्ज उपमहानगरपालिकाले सबै विद्यालयहरुमा पठनपाठन बन्द रहने जानकारी दिएको छ । शिक्षा महाशाखा प्रमुख गोर्ख बहादुर थापाले सूचना निकालेर सामुदायिक, संस्थागत तथा धार्मिक बिद्यालयहरुलाई सार्वजनिक बिदा दिइएको जनाउँदै पठनपाठन बन्द रहने जानकारी दिएका हुन् ।
यस्तै डुडुवामा पनि पालिका अन्तर्गत रहेका सामुदायिक तथा निजी विद्यालय, मदरसा तथा मुस्लिम समुदायका कर्मचारीलाई विदा दिइएको पालिकाका अध्यक्ष नरेन्द्रकुमार चौधरीले जानकारी दिए ।
पालिकाका प्रमुख प्रशासकीय अधिकृत अशोककुमार पाण्डेयले सूचना प्रकाशित गर्दै मोहर्रम पर्वको अवसरमा सम्पूर्ण बिद्यालय बन्द रहनुका साथै पालिका अन्तर्गतका कार्यालयहरुमा मुस्लिम समुदायका कर्मचारीलाई बिदा दिइएको उल्लेख गरिएको छ । पालिका अध्यक्ष चौधरीले इस्लाम धर्माबलम्बीलाई शुभकामना समेत दिएका छन् ।
उता खजुरा गाउँपालिकाले २० गतेबाटै वर्षे बिदा घोषणा गरेका कारण मोहर्रम पर्वको बिदा सोही बिदा अन्तर्गत पर्न गएको जनाएको छ । अध्यक्ष डम्बर बिक तुफानले वर्षे बिदाकैबीच पर्व परेको जनाउँदै मुस्लिम समुदायलाई शुभकामना ब्यक्त गरे ।
Comment
0 Comments