एसइई पास गर्ने ४१ छात्रालाई साइकल वितरण
डुडुवा (बाँके) ६ असार : डुडुवा गाउँपालिकाले छात्रा प्रोत्साहन कार्यक्रम अन्र्तगत एसइई पास गरेका छात्राहरुलाई साइकल वितरण गरेको छ । घरदेखि टाढा बजारसम्म गएर उच्च शिक्षा हाँसिल गर्न सहजता तथा उत्प्रेरणाका लागि गाउँपालिका अन्र्तगतका सामुदायिक तथा नीजि विद्यालयहरुका छात्रालाई साइकल वितरण गरिएको हो ।
२०८० सालमा एसइइ पास गरेका गाउँपालिकाका ८ वटा विद्यालयका ४१ जना छात्रालाई साइकल वितरण गरिएको शिक्षा शाखाका स्रोतव्यक्ती राम एकबाल मण्डलले जानकारी दिए ।
पालिका कार्यालयमा आयोजित एक समारोहका विच साइकल वितरण गर्दै गाउँपालिका अध्यक्ष नरेन्द्रकुमार चौधरीले किशोरीहरुलाई उच्च शिक्षा हाँसिल गर्न प्रोत्साहन गरेको भन्दै उच्च शिक्षा हाँसिल गर्न टाढा तथा बजारसम्म आउजाउ गर्न मद्दत पुग्ने बताए ।
उनले विशेष गरि मधेशी समुदायका किशोरीहरु साधारण कक्षा पढेपछि विभिन्न कारणले उच्च शिक्षा हाँसिल गर्न नसकेको समस्यालाई यो कार्यक्रमले अन्त्य गर्ने विश्वास व्यक्त गरे । अध्यक्ष चौधरीले शिक्षा भनेको उज्यालोको प्रकाश भएकाले बालबालिकालाई शिक्षातर्फ विशेष ध्यान दिनुपर्नेमा जोड दिदैँ पालिकाभित्र सञ्चालित विद्यालयहरुमा शैक्षिक गुणस्तरीयताका लागि पहिलो चरणमा आधारभूत विद्यालयलाई सिसि क्यामरामार्फत निगरानी समेत गरिरहेको जानकारी दिए ।
कार्यक्रममा उपाध्यक्ष शाहिदा बानो, वडा अध्यक्षहरु पटेश्वर कुर्मी, आमोद तिवारी, प्रमुख प्रशासकीय अधिकृत अशोककुमार पाण्डेय, विभिन्न विद्यालयका शिक्षक, अभिभावक, विद्यार्थीलगायतको सहभागिता रहेको थियो । गाउँपालिकाले हरेक वर्ष एसइई पास गर्ने छात्राहरुलाई नियमित रुपमा साईकल वितरण गर्दै आएको छ ।
Comment
0 Comments